Twitter spaces, espacios de Twitter edota, euskaraz, Twitterreko guneak deituriko funtzionalitateaz arituko naiz gaurkoan.
Horren ezaguna den txori urdinaren berrikuntza nabermenduena da aipaturikoa, Twitterren audio-txat gela bezala definitu ahalko genukeena. Ahotsa emateko eta entzuteko espazio bat. Komunitatearekin hitz egin eta audio elkarrizketa azkarrak egiteko gunea.
Nola sortu espazio bat?
- Sakatu “Redactar”/”Idatzi” botoia, txio bat argitaratzeko erabiltzen den botoi bera, alegia.
- Zabaltzen diren aukeren artean, lehena “Espacios” izango da. Bertan klik egin beharko duzu.
- Jarraian, zure Twitter guneari izen bat emateko unea izango da.
- Nola deituko den erabaki ondoren, sakatu “Hasi zure espazioa” edo konfiguratu beste data edo ordu batean has dadin. Horretarako, erlojua duen egutegiaren ikonoa sakatu.
- Espazio bat sortzen duzunean, zure mikrofonoa itzalita egongo da. Prest zaudenean, sakatu mikrofonoaren ikonoa eta hitz egin!
Erraza da espazio horiek sortzea, beraz. Animatuko al zara euskal komunitatean gune horiei bultzada ematen?
Nola parte hartu besteen guneetan?
Instagrameko istorioak bezala, Twitterreko hasiera orriaren goikaldean agertuko dira gune aktiboak. Jarraitzen ditugun kontuek gune bat martxan jarri badute, hasierako txioen aurretik agertuko da gunea. Bertan klik egin eta bertako parte-hartzaileen elkarrizketa entzuten hasiko zara. Era berean, mikrofonoaren ikonoarekin, solasaldian parte hartzeko aukera ere izango duzu.
Ikusi al duzu noizbait guneren bat martxan?
Nolanahi ere, duela hilabete gutxi Twitterrek abiatu duen aukera hau oso interesgarria iruditzen zait podcastaren munduak izan duen iraultza dela eta. Era berean, informazioa entzunez hobeto barneratzen dugun horientzat ideia paregabea da. Ez al duzu uste?
Irudia: blogging-techies.com