Komunikazioa, diseinu grafikoa, ikus-entzunezkoak, web garapena, ofimatika eta gaitasun pertsonalen inguruko formazioak eskaintzen ditugu TaPuntun.
Talde txikitan, modu teoriko-praktikoan eta giro onean honako ezagutzak barneratu nahi badituzu, zatoz!
Asko eta asko gara sare sozial komertzialek gure jendartean sortzen duten kaltearen kontzientzia hartu dugun enpresa, eragile eta erakundeak. Baina, nola utzi hauek alde batera gure komunitatearekin daukagun harremana eten gabe? Ikastaro honetan sare sozial «osasungarrietara» trantsizioa egiteko gakoak ezagutuko dituzu.
Marka bat zer den hausnartuko dugu lehenengo. Zure proiektuari dagokion marka jasotzen duen eskuliburu bat jaso duzu agian, irizpidez beteta. Eta posible da diseinatzaile ez den langilearentzat bertako irizpideak erabiltzen ez jakitea. Hau ulertzen lagunduko dizugu. Zure nortasuna grafikoa aztertu eta aplikatzeko orduan kontutan izan beharko zenituzkeen gakoak eta hizkuntza grafikoa landuko ditugu ikastaro honetan.
WordPress-en, webgune bat zerotik sortu eta kudeatzeko lehen urratsak ezagutuko dituzu. Ikasi edukiak argitaratzen, diseinua pertsonalizatzen eta oinarrizko pluginak erabiltzen.
Erakunde zein herritar gisa ziurtagiri digitala lortu nahiko zenuke baina ez dakizu nondik hasi? Ikastaro honi esker merkatuan dauden ziurtagiri digitalak ezagutuko dituzu, bakoitzaren nondik norakoak argitu eta eskatzeko jarraibideak zeintzuk diren ikasi.
Proiektuetan pertsonok erdigunean gaudela diogunean zer esan nahi dugu? Elkar-ulertzeko ahalegina egin eta gaitasun emozionaletan trebauta gaude langileok? Zaintzaren kontzeptua zabala izanik ere TaPuntun sortu ginenetik ari gara esparru hau lantzen, eta horregatik gure lan egiteko modua ez dugu ulertzen elkar-zaintzarik gabe. Gure esperientzian oinarrituta zaintzaren mundu transbersalean murgilduko gara, lan bizigarrieranzko bidean.
Zure enpresa, erakunde, mugimendu edota elkartearen barneko komunikazioa hobetu nahi duzu? Ikastaro honetan nori, zer eta ze tresnen bidez komunikatu landuko duzu, ikuspegi estrategiko batetik abiatuta. Bazkide, lankide, harpidedun edo taldekideen artean ematen den komunikazioa ordenatzeko balioko dizu.
Sare sozialetan dugun komunitatearen interakzioak ekarriko digu irismena. Era berean, gure markarekin benetazko loturak sortu nahi baditugu, ezinbestekoa izango da publikoaren interakzioa. Gure komunitatearen interakzioa lortu eta mantentzeko hainbat gako eta baliabide landuko ditugu ikastaro honetan.
Ikastaro honetan zure proiektu edo elkartearen eta hedabideen arteko komunikazioa erraztu eta elkarlan eraginkorrago baterako gakoak eskainiko dizkizugu. Aldi berean, zure komunikazio helburua betetzeko bideak landuko ditugu.
Podkast bat sortzeko beharrezkoak izango diren pauso eta baliabideak ikasiko ditugu. Ideiatik hasita produktu finalera iritsiko gara. Podkasta gure publikora gerturatzeko sareratze estrategiarekin bukatuko dugu ikastaroa.
Gaur egun sare sozialetan arrakasta eta oihartzun gehien duten bideoak aztertu eta sortzen ikasiko dugu. Bideoen joerak, teknika berritzaileak eta bideo biralen ezaugarriak ikusiko ditugu. Era berean, bideo horiek sortu ahal izateko teknikak ikasiko ditugu.
Ikastaro honi esker Canva tresna ezagutu eta berarekin praktikatu ahal izango duzu. Doako tresna honekin edozein euskarri eta eduki digital nahiz fisiko diseinatu eta sortu ahal izango dituzu. Era berean, zure iruditeriarekin txantiloiak sortzen erakutsiko dizugu.
Zure mugikorrarekin egiten dituzun argazkiei etekin handiagoa atera nahi badiezu, hau da zure ikastaroa. Ikasi mugikorraren kamerari ahalik eta funtzionalitate handiena ateratzen. Lortu argazki profesionalagoak zure sakelekoarekin. Argazkiak ateratzeaz gain, edizioarekin argazkiak hobetzen ikasiko duzu.